1 სექტემბრიდან საქართველო კალათბურთში 2022 წლის ევროპის ჩემპიონატს მასპინძლობს, რომლის ტრანსლაციაც „საზოგადოებრივი მაუწყებლის პირველი არხის”  პირდაპირ ეთერში მიმდინარეობს.  

საქართველოს კალათბურთელთა ნაკრები  პირველ შეხვედრაში  მცირედი სხვაობით 76:79 (ოვერტაიმის გათვალისწინებით) ბელგიის ნაკრებთან დამარცხდა. მატჩი თბილისის დროით 20:50-ზე  დაიწყო და წუთში საშუალოდ 111 ათასმა ტელემაყურებელმა ნახა. მატჩის მიმდინარეობისას მთლიანი სატელევიზიო ყურების 26 „საზოგადოებრივი მაუწყებლის პირველ არხზე“ იყო მიმართული. 

მეორე შეხვედრა  3 სექტემბერს, A ჯგუფის ფავორიტი ნაკრების, ესპანეთის  წინააღმდეგ გაიმართა, რომელიც ესპანეთის სასარგებლოდ 90:64 ანგარიშით დამთავრდა. მატჩს ტელევიზიით  წუთში საშუალოდ 95 ათასმა ინდივიდმა უყურა, რის შედეგადაც „საზოგადოებრივი მაუწყებლის პირველი არხის“ სატელევიზიო წილმა  23% შეადგინა. 

ევრობასკეტი 2022-ის რიგით მესამე შეხვედრა საქართველოში 4 სექტემბერს ჩატარდა და ამჯერად საქართველოს  კალათბურთელთა ნაკრებმა  თურქეთის წინააღმდეგ 88:83 (2 ოვერტაიმის გათვალისწინებით) ანგარიშით გაიმარჯვა.  მატჩის ტრანსლაცია პირდაპირ ეთერში თბილისის დროით 21 საათზე დაიწყო და წუთში საშუალოდ 119 ათასმა ტელემაყურებელმა ნახა, შედეგად „საზოგადოებრივი მაუწყებლის პირველი არხის“  წილი  სრულ სატელევიზიო ყურებაში 27%-მდე გაიზარდა. 

აღნიშნული მატჩების მაყურებელთა 68% თბილისის, ხოლო 32% რეგიონის წარმომადგენელი იყო. რაც შეეხება მატჩების  მაყურებელთა ასაკობრივ განაწილებას, ყველაზე მეტი, მაყურებელთა  23% არხს  45-62 წლამდე კაცების კატეგორიაში ჰყავდა, ხოლო  ქალების შემთხვევაში ყველაზე მაღალი  პროცენტული მაჩვენებელი (16%) - 18-45 წლამდე ასაკობრივ კატეგორიაში. სამივე მატჩის ტრანსლაციის შედეგად, „საზოგადოებრივი მაუწყებლის პირველი არხის“ რეიტინგი გაიზარდა და სრულ სატელევიზიო ყურებაში მეორე ადგილი დაიკავა. 

მონაცემები ემყარება თბილისისა და საქართველოს 6 დიდი ქალაქის (რუსთავი, გორი, ბათუმი, ქუთაისი, ზუგდიდი, ფოთი) პანელს სადაც კომპანია „ტრი მედია ინტელიჯენსი“ ზომავს სატელევიზიო ყურებას. მონაცემები აღებულია 4 წელს ზემოთ მოსახლეობისგან, სტუმრებისა და დროში წანაცვლებული ყურების გათვალისწინებით.